28 Eedeysane ayaa shalay la soo taagay Maxkamadda Sare ee Federalka Ethiopia ee magaalladda Addis Abeba, kuwaasi oo lagu eedeeyey inay ku hawlanaayeen sidii ay Dowlad Islaami kaga dhawaaqi lahaayeen gudaha Ethiopia.
Hadal ka soo baxay Maxkamadda ayaa lagu sheegay inay Eedeysanayaasha Tababaro Milliteri ku soo qaateen gudaha Somalia tan iyo sannadkii 2003-dii, isla markaana la sheegay inay Alshabaab ku biireen sannadkii 2006-dii.
Dacwad-oogayaasha Maxkamadda Sare ee Federalka Ethiopia waxay kaloo sheegeen inay 28-ka Eedeysane ay Alshabaab ka barbar dagaalameen iska horimaadyo ka dhaca qeybaha Somalia, gaar ahaan weeraro lagu qaaday Ciiddanka AMISOM.
Sidoo kale, Eedeysanayaasha waxaa lagu soo oogay inay qorsheynayeen inay weeraro ka geystaan gudaha Ethiopia tan iyo sannadkii 2011-kii.
Ugu dambeyntii, Garsooraha Maxkamadda Sare ee Federalka Ethiopia, waxa uu 28-ka Eedeysane ku kala xukumay Xabsi u dhexeeya 4 bilood ilaa 21-sanno.
©Radio Dalsan