Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa ku dhawaaqay in dalka uu hadda ku jiro “dagaal guud” oo ka dhan ah kooxda Alshabaab, balse wuxuu shacabka Soomaaliyeed ku kalsoonaysiiyay in dowladdu leedahay istiraatiijiyad cad oo lagu jebinayo kooxaha xagjirka ah.
Madaxweynaha ayaa hadalkan ka jeediyay munaasabadda soo xiritaanka Shirweynaha Xuquuqda Aadanaha oo ka dhacay magaalada Muqdisho, halkaas oo uu ku xusay in amniga, xasilloonida iyo ilaalinta xuquuqda aadanaha ay yihiin tiirarka ugu muhiimsan ee dowladdiisa.
“Waddanku wuxuu ku jiraa dagaal guud, weli wuu socdaa, laakiin annaga ayaa leh istiraatiijiyad cad. Dagaalka wuu sii soconayaa, marna waan riixnaa, marna waannu riixnaa, laakiin ka go’naansho ayaan leenahay,” ayuu yiri Madaxweyne Xasan Sheekh.
Inkastoo aanu shaacin faahfaahinta hawlgallada socda, haddana Madaxweynaha wuxuu tilmaamay in Ciidanka Xoogga Dalka Soomaaliyeed oo gacan ka helaya saaxiibada caalamiga ah, ay wadaan qorshe wejiyo leh oo lagu burburinayo saldhigyada kooxda Alshabaab.
Hadalka Madaxweynaha ayaa imaanaya iyadoo ay socdaan dagaallo culus oo ka socda bartamaha iyo koonfurta dalka, halkaas oo ciidamadu dhawaan dib uga qabsadeen deegaano badan oo horey u haysteen Al-Shabaab.
Madaxweynaha ayaa sidoo kale sheegay in guusha laga gaaro xagjirnimada ay muhiim u tahay sugidda xuquuqda iyo badqabka shacabka Soomaaliyeed, wuxuuna si adag u cambaareeyay falalka arxan darrada ah ee ay kooxdaasi ku hayso dadka rayidka ah.
“Qaran ma horumaro iyadoo cabsida argagaxisadu ku hoos noolyihiin. Dagaalka aan kula jirno Khawaarijtu ma aha oo kaliya mid amni, waa mid mustaqbalka, karaamada iyo xorriyadda shacabka lagu sugayo,” ayuu yiri Madaxweyne Xasan Sheekh.
Dhanka kale, saraakiisha ciidamada ayaa xaqiijiyay in hawlgallo ballaaran ay ka socdaan Hirshabelle, Galmudug iyo Jubbaland, halkaas oo Al-Shabaab laga saaray deegaano badan, inkastoo ay weli wadaan weerarro dhuumaaleysi ah.
Hadalka uu Madaxweynaha ka jeediyay khudbaddiisa wuxuu muujinayaa in dagaalka lagula jiro kooxda Alshabaab uu yahay mid dheer, balse ay dowladda waddo qorshe qoto dheer oo guul looga gaari karo.
Waxaa si gaar ah loo xusay in dowladdu ay wajahayso caqabado isku dhafan—milatari, bani’aadanimo iyo siyaasadeed—oo u baahan in la isku marmaaro si loo gaarsiiyo guusha dalka iyo dadka Soomaaliyeed.
