Kooxo ku hubeysnaa Bastoolad ayaa xalay waxaa ay gudaha degmada Dharkeenley ee Gobolka Banaadir ku dileen Wiil la sheegay inuu shacab ahaa, waxaana falkaas laga helayaa faah faahino.
Dad ayaa waxaa ay ku warrameen in Wiilka ay toogteen rag hubeysan, xili uu sugnaa meel ku dhow aargada Dharkeenley gaar ahaa meel aan ka fogeyn Shirkadda Hormuud, isagoo u geeriyooday rasaas lagu dhuftay.
Raggii ka dambeeyay falkaas ayaa goobta si dhaqsi ah uga baxsaday, isla markaana waxaa sida caadada aheyd gaaray halkaas Ciidamo ka tirsan kuwa Booliska dowladda Federaalka oo qaaday Meydka.
Wararka ayaa intaas waxaa ay kusii darayaan in Ciidamada Booliska ee goobta tegay ay baaritaano kooban sameeyeen, wallow markii dambe ay halkaas tageen, iyagoona horey u qaaday Meydka Marxuumka.
Caasimadda dalka ee Muqdisho ayaa waxaa xiliyada qaarkood ka dhaca dilal qorsheysan oo geysteen rag ku hubeysan Bastoolado, waxaana dilkii xalay ka dhacay degmada Dharkeenley ee Gobolka Banaadir uu kamid noqonayaa dilal hore uga dhacay Muqdisho.
