Dibadbaxayaal ka soo jeeda Maamul-gobaleedka Cafarta ay maanta xireen Waddada weyn isku xirta Ethiopia iyo Jabuuti, isla markaana ah jidka ugu weyn ee ay maraan badeecadaha la dhoofinayo iyo kuwa la soo dejinayo.
Wargeyska Addis Standard ee ka soo baxa magaalladda Addis Abeba ayaa qoray inay Dibadbaxayaasha Cafarta codsanayaan in la soo af-jaro waxa ay ku sheegeen shilal rabshado wata oo ay dhowrkii isbuuc ee la soo dhaafay geysteen Koox Soomaali ah oo ka soo jeeda Qabiilka Ciisaha.
Dibadbaxayaasha waxay sheegteen in rabshadahaasi lagu dilay dad badan oo Cafar ah, isla markaana hanti badan la burburiyey.
Jidka la xiray ayaa la sheegay inuu u dhexeeyo magaallooyinka SEMERA iyo Awaash.
Sawiro laga soo qaaday Jid-gooyadda taalla Waddadaasi ayaa muujinaya dhowr Gaadiidka Xamuulka oo waddada taagan.
Sidoo kale, Jid-gooyadaasi waxay waxyeello u geysatay waddada xadiidka ee ay isticmaalaan Tareenadda u kala goosha dalalk Ethiopia iyo Jabuuti
Dhinaca kale, Dibadbaxayaasha Qowmiyadda Cafarta waxay sheegeen inaysan ku faraxsanayn Go’aankii Dowladda Federalka Ethiopia ee Ciiddanka Khaaska ee Cafarta looga saaray Deegaanadda ay rabshaduhu ka dhaceen.
dibadbaxayaasha Cafarta waxay kaloo codsanayaan in Deegaanadooda laga daad-gureeyo dadka ka soo jeeda Beesha Ciisaha ee Soomaalida ee ay isla degaan.
