Guddoomiyihii Baarlamaanka Puntland ee Khamiistii la soo dhaafay xilka looga Mooshin ee Cabdixakiin Maxamed Axmed Dhooba-daareed ayaa mar kale sheegay inuu yahay Guddoomiyaha Baaramaanka Puntland.
Guddoomiye Dhooba-daareed oo Warbaahinta Shir Jaraa’id ugu qabtay Degmada Xingalool ee Gobolka Sanaag ayaa waxaa uu sheegay in weli xilka aan laga qaaday, isla markaana waxaa uu sharci darro ku tilmaamay xil ka qaadista ay ku sameeyeen Xildhibaanada Baarlamaanka Puntland.
Sidoo kale Dhooba-daareed ayaa waxaa uu tilmaamay in sharci uu ku yimid xilka Guddoonka, isagoona ku adkeestay in uu yahay Gudoomiyaha Baarlamaanka uuna ku yimid sifo sharci ah.
Dhinaca kale Cabdixakiin Maxamed Axmed Dhooba-daareed ayaa Xukuumadda Madaxweyne Saciid Deni ku eedeeyay inay ka dambeysay weerarkii lagu qaaday Xarunta Baarlamaanka Puntland, isagoona weerarkaas si kulul u Cambaareeyay.
Ugu dambeyntii Guddoomiyihii Baarlamaanka Puntland ee Dhooba-daareed ayaa waxaa uu tilmaamay in Puntland ay u baahan tahay badbaadin, wuxuuna Bulshada ku dhaqan Gobolada Sool iyo Sanaag ugu baaqay iskaashi iyo wadashaqeyn.
Si kastaba Khamiistii la soo dhaafay Xildhibaanada Baarlamaanka Puntland ayaa Codka kalsoonida kala noqday Guddoomiye Dhooba-daareed, waxaana Xildhibaanada lagu wadaa in Guddoomiye Cusub ay soo doortan maalmaha soo socda.
