Gudoomiyaha Gobolka Bakool Maxamed Cabdi Tool ayaa ku eedeeyay taliyaha Ciidanka dowladda Soomaaliya ee gobolkaas uu bixiyay amar lagu dilay haweeneey dhawaan lagu soo qabtay hwlgal laga sameeyay deegaanka Muura Gaabeey ee Gobolkaasi Bakool.
Waxa uu sheegay in Gabadhaas markii ay ciidanka Gacanta ku dhigeen baaritaano dheer kadib la ogaaday in ay aheyd basaasad u shaqeyneysay Al-Shabaab,isla markaana ay aheyd in Maxkamad la soo taago laakin Malintii xigtay Gabadhaas la toogtay.
Sidoo kale waxa uu hadalkiisa intaas ku daray in markii baadi goob lagu sameeyay Ciidamadii toogtay Gabadhaas ay sheegeen in uu amarka lagu dilay lahaa Cabdiraxmaan Maxmed Cismaan Timacade taliyaha Guutada 8,aad ee degmada Xudur.
Ugu dambeyn waxa uu sheegay in ehelada Gabadhaas ay haatan wadaan dacwad ah in ay ogaadaan sababtii loo dilay Gabadhooda,dhacdadaana loo gudbiyay taliyaha qeybta oo jooga Baydhabo iyo taliyaha Ciidanka xoogga dalka oo jooga Muqdisho.
Hoos Ka Dhageyso Wareysiga  Gudoomiyaha Gobolka Bakool
Dhanka kale Dalsan ayaa waxa ay la xiriirtay Col,Cabdiraxmaan Maxmed Cismaan Timacade oo ah Sarkaalka eedeynta loo jeedinyay, waxa uuna sheegay in dilka Gabadhaas uu jiro isla markaana laga soo qabtay tuulada Moora Gaabeey,ayna aheyd haweeney basaas ah oo Al-Shabaab Caanaha ka daba qaadi jirtay sida uu hadalka u dhigay.
Waxa uu sheegay in Gabadha sababta ay ciidamadu u dileen  ay aheyd in ay iskudayday in ay baxsato kadibna la toogtay, wararka ka soo baxaya Gudoomiyaha Gobolka Bakool uu yahay mid aan waxba ka jirin.
Hoos Ka Dhageyso Wareysiga Col,Cabdiraxmaan Maxmed Cismaan Timacade.
