Warar dheeraad ah ayaa ka soo baxaya Shil gaari oo sababay Khasaaro isugu jiray dhimasho iyo dhaawac oo ka dhacay duleedka Magaalada Hargeysa ee Somaliland.
Shilkan ayaa waxaa uu si gaar ah uga dhacay deegaan lagu magacaabo Dacar Buluq,isla markaana waxaa uu yimid kadib markii gaari Min Bas ah uu ku rogmaday deegaankaas.
Faysal Xiis oo ah Afhayeenka Booliska maamulka Somaliland oo warbaahinta la hadlay ayaa waxa uu sheegay in Shilkaas ay ku geeriyoodeen Afar ruux,kuwaasi oo qaarkood ay ku jiraan Ajaanib.
Sidoo kale Afhayeenka ayaa waxaa uu tilmaamay in laba ruux oo u dhashay Bangladesh iyo laba kale oo reer Somaliland ahaa oo uu ku jiray Darawalkii waday gaariga Shilka galay ay halkaasi ku dhinteen.
Wuxuu intaas ku daray Faysal Xiis in 10 qof ay ku dhaawacmeen Shilka,isla markaana waxaa kamid ahaa 4 qof oo hestay dhalasha Bangladesh iyo kuwo oo ahaa Somaliland,waxaana la dhigay Isbitaalka weyn ee Magaalada Hargeysa.
Ugu dambeyntii Afhayeenka Booliska maamulka Somaliland ayaa sababta uu u rogmaday gaarigaas ku sheegay inay tahay,kadib markii Darawalkii waday Gaariga uu Talefoonka uu ku hadllaayay,sidaasina uu falka u dhacay.
