Kooxda Xisbullah ee Lubnaan ayaa xaqiijisay in hoggaamiyahoodii muddo dheer xilka hayay, Xasan Nasrallah, uu ku dhintay duqayn ay diyaaradaha dagaalka ee Israa’iil ka gaysteen magaalada Bayruut maalintii shalay. Duqeyntan ayaa qayb ka ahayd weerarro isdaba joog ah oo Israa’iil ku qaaday bartilmaameedyo kala duwan oo ay Xisbullah ku lahayd gudaha Lubnaan, iyada oo jawaab u ahayd weerarro dhowaan ka yimid kooxdan.
Xasan Nasrallah, oo hoggaaminayay Xisbullah tan iyo 1992-kii, ayaa ahaa hogaamiye aad u awood badan oo qeyb weyn ku lahaa isbedellada siyaasadeed iyo militari ee gobolka, gaar ahaan dagaalka kooxdiisu kula jirtay Israa’iil iyo doorka ay ku lahayd dagaallada ka socda Suuriya iyo Yaman. Nasrallah wuxuu ahaa astaan muhiim ah oo ay taageerayaashiisu u arkeen halyey difaacaya qadiyadda Carabta iyo Muslimiinta, halka Israa’iil iyo xulafadeeda ay u arkayeen halis amni oo weyn.
Dhaxalka siyaasadeed iyo militariga ee Xasan Nasrallah waa mid la taaban karo, isagoo muddo 32 sano ah ka badbaaday weerarro dhowr ah oo looga gol lahaa in lagu khaarajiyo. Hoggaamiyihii ka horreeyay ee Xisbullah, Sayid Cabaas Musawi, ayaa isna lagu dilay duqeyn ay Israa’iil ku qaaday sanadkii 1992, taasoo keentay in Nasrallah uu qabto hoggaanka kooxdaas.
Dhimashada Xasan Nasrallah waxay noqotay dhacdo weyn oo saameyn ku yeelan karta siyaasadda iyo amniga gobolka, iyadoo la filayo in Xisbullah uu la tacaalo arrimo ay ka mid yihiin cida noqon doonta hoggaamiyaha cusub iyo sida ay kooxdu uga falcelin doonto dilka hoggaamiyahooda. Waxaa laga cabsi qabaa in dagaallo waaweyn oo dhexmara Xisbullah iyo Israa’iil ay qarxaan, iyadoo labada dhinac horeyba ugu jiray dagaal qadhaadh oo dhinaca xuduudka iyo siyaasadda gobolka ah.
Dowladda Lubnaan iyo wadamada caalamka ayaa isha ku haya xaaladda sii xumaanaysa ee Lubnaan, iyada oo laga cabsi qabo in dilka Nasrallah uu keeno kacdoon cusub iyo xiisad korodha oo dhexmarta Xisbullah iyo xulafada reer Galbeedka, gaar ahaan Israa’iil. Waddamada gobolka sida Iiraan, oo ah taageere weyn oo Xisbullah, ayaa laga filayaa inay ka falceliyaan dhimashada Nasrallah, iyadoo ay suuragal tahay in xiisadaha militari ay ku sii faafaan guud ahaan Bariga Dhexe.
Waxaa hadda isha lagu hayaa cida la wareegi doonta hoggaanka Xisbullah iyo qaabka ay kooxda uga jawaabi doonto duqeynta lagu dilay hoggaamiyahooda oo muddo dheer lahaa taageerayaal aad u badan oo ku sugan Lubnaan iyo meelo kale oo gobolka ah.
