Wararka aan ka heleyno Gobolka Shabeellaha Hoose ayaa waxaa ay sheegayaan in deegaan ka tirsan Gobolkaas Goordhow qarax lagula eegtay Kolonyo ay la socdeen Ciidamo ka tirsan kuwa Milateriga dowladda Soomaaliya.
Qaraxaas oo ahaa miino nooca dhulka lagu aaso ah ayaa waxaa Ciidanka Milateriga dowladda lagula eegtay xili ay socdaal ku marayeen deegaanka Muuri ee Gobolka Shabeellaha Hoose.
Wararka ayaa intaas kusii daraya in qaraxa uu haleelay mid kamid ah gaadiidka ay la socdeen Ciidanka dowladda, kaasi oo ay saarnaayeen Askar badan, waxaana qaraxa ka dhashay khasaaro isugu jira dhimasho iyo dhaawac.
Dad goobjoogayaal ah ayaa soo sheegaya in qaraxa ay ku dhinteen ilaa iyo 6 Askari oo ka tirsan Ciidanka dowladda, halka saddex kalena dhaawac uu soo gaaray, kuwaasi goobta laga qaaday.
Ilaa iyo hada ma jiro cid sheegatay Mas’uuliyada qaraxaas ka dhacay deegaanka Muuri ee Gobolka Shabeellaha Hoose, hayeeshee qaraxyada noocaan oo kale ayaa waxaa inta badan sheegta Al-shabaab.
