Al-shabaab iyo ciidanka Millateriga dowladda federaalka Soomaaliya ayaa ku dagaalamay duleedka Magaalada Marka ee xarunta Gobalka Shabeellaha Hoose, waxaana la sheegay in dagaalkaas uu khaasaare ka dhashay.
Dagaalka ayaa yimid ka dib markii Al-shabaab ay weerar ku qaadeen saldhigga ciidanka Millateriga ku leeyihiin degaanka Ceeljaale oo ah duleed magaalada Marka.
Sarakisha ciidanka dowladda ee degaanka lagu dagaalamay ayaa sheegay in ay iska difaaceen dagaal kaga yimid Al-Shabaab, waxaana intaas ay ku dareen in ay khaasare gaarsiiyeen.
Mid ka mid ah Saraakiisha ciidanka Dowladda ee Ceeljaalle ayaa sheegay ay dagaalkaas ku dileen xubin sare oo Al-shabaab ka tirsan, isagoo carrabka ku dhuftay in ay jiraan tiro kale oo ay dhaawaceen.
Degmooyin ka tirsan Gobolka Shabeelaha Hoose waxa tiro dhowr jeer ah ku dagaalamay Al-shabaab iyo Ciidanka dowladda Federaalka Soomaliya, waxaana inta badan dagaaladaas ka dhasha khasaare isugu jira dhimasho iyo dhawaaca.
