Dagaal culus ayaa maanta ka qarxay meel ku dhow xadka u dhexeeya gobollada Hiiraan iyo Shabeellada Dhexe, kadib markii maleeshiyaad ka tirsan kooxda Al-Shabaab ay fuliyeen weerar ismiidaamin ah oo lala beegsaday saldhig ay ciidamada Xoogga Dalka Soomaaliyeed ku lahaayeen agagaarka deegaanka Ceel Hareeri.
Weerarka ayaa la sheegay inuu ku billowday gaari laga soo buuxiyay walxaha qarxa, kaas oo lagu beegsaday saldhig ciidan oo ku yaalla inta u dhaxaysa Ceel Hareeri iyo Aadan Yabaal. Sida ay sheegeen ilo deegaanka ah, qaraxa ayaa ka dhacay meel u dhow Ceel Hareeri kahor inta uusan gaarin bartilmaameedka rasmiga ah, kadib markii ciidamada ammaanka ay ka hortageen gaadiidkii qaraxa watay.
Markii uu qaraxa dhacay kadib, waxaa bilowday dagaal culus oo labada dhinac ay isku adeegsadeen hub culus iyo rasaas xooggan, iyadoo si weyn loo maqlayay jugta madaafiicda iyo rasaasta socotay saacado badan.
Wararka ugu dambeeya ee laga helayo goobta dagaalka ayaa sheegaya in weli iska horimaadku uu socdo, iyadoo labada dhinac ay kala kulmeen khasaare dhimasho iyo dhaawac leh, inkasta oo aan weli si rasmi ah loo xaqiijin karin tirada rasmiga ah ee waxyeellada.
Dagaalkan ayaa kusoo beegmaya iyadoo ay socdaan howlgal ballaaran oo ay ciidamada Xoogga Dalka iyo maleeshiyaadka deegaanka ka wadaan deegaannada xuduudka u dhexeeya Hiiraan iyo Shabeellada Dhexe, si looga xoreeyo gacanta Al-Shabaab.
Ciidamada dowladda ayaa horey u ballanqaaday in aysan joojin doonin dagaalka lagula jiro kooxda Al-Shabaab, ilaa laga xaqiijinayo amniga iyo xasiloonida guud ee dalka.
