Ciiddanka AMISOM iyo kuwa Dowladda Federalka waxay barqanimaddii maanta weerar labo jiho ka galeen magaalladda Marka oo ay Dagaalamayaasha Alshabaab shalay si fudud ku qabsadeen.
Goobjoogayaal ayaa sheegay inuu labada dhinac dhex maray dagaal culus oo la isku weydaarsaday noocyadda hubka fudud iyo kuwa culus.
Ciiddanka AMISOM iyo kuwa Dowladda Federalka ayaa la tilmaamay inay guluf ka soo qaadeen dhinaca Jidka Xeebta iyo Waddada kale ee ka timaada Deegaanka Shalambood, waxayna Alshabaab kala kulmeen iska caabin adag, walow ay markii ugu dambeyntii u itaal sheegteen, iyadoo ay Alshabaab ka wada baxeen magaalladda Marka.
Ma cadda sababaha rasmiga ee ay Alshabaab dib ugu gurteen magaalladda Marka oo ay shalay si fudud ku qabsadeen, iyagoo aan Hardan Colaadeed u gelin qabsashadda magaalladaasi.
Alshabaab ayaa la sheegay inay u dhaqaaqeen Jidka Jilib-Marka, kadib, markii dagaalkii maanta loogu itaal sheegtay.
Ciiddanka Huwanta waxay Fariisimo ka dhigteen goobihii ay 24 saacadood ka hor Alshabaab xaarxaarteen, sida Dekedda Marka iyo Xarunta Maamulka Degmadda.
Dhinaca kale, Maamulkii Degmadda Marka iyo Mas’uuliyiin ka tirsan Dowlad-gobaleedka K/galbeed ayaa ku sugan gudaha magaalladda Marka, waxayna Dadweynaha ugu baaqeen inay is-dejiyaan, isla markaana laga shaqeeyo Xoojinta Ammaanka.
Si kastaba ha ahaatee, Xaallada guud ee magaalladda Marka ayaa haatan deggan, inkastoo ay Dadweynaha ka walaacsan yihiin inuu mar kale dagaal ka dhex qarxo labada dhinac.
©Radio Dalsan    Â
