Hadal ka soo baxay Wasaaradda Gaashaandhigga ee dalka Britain ayaa lagu sheegay in Markabka Dagaalka ee HMS Bulwark uu waarberigii hore ee saakayo uu soo badbaadiyey ugu yaraan 500 oo Tahriibayaal la socotay afar dooni, kuwaasi oo soo dirsaday Qeylo-dhaan loogu soo gurmanayo.
Diyaaradaha Helikoptarada ayaa soo sahmiyey Tahriibayaashaasi oo ku xayirnaa Badda Mediterranean Sea.
Tahriibayaasha waxay ka soo shiraacdeen Xeebaha dalka Libya, iyagoo ku soo fool lahaa Jesiiradda Lampedusa ee dalka Talyaaniga.
Dhinaca kale, Ciiddanka Difaaca ee dalka Ireland ayaa sheegay inay shalay soo badbaadiyeen Tahriibayaal ku sugnaa Badda Mediterranean Sea.
Markabka Dagaalka ee Ciiddanka Badda Ireland ee lagu magacaabo Le Eithne ayaa ku guuleystay inay soo badbaadiyaan 113 Tahriibayaal la socday dooni yar.
Dadka la badbaadiyey waxaa ku jiray ilmo maalmo ka hor dhashay.
Maraakiibta dagaalka ee Dowladaha xubnaha ka ah Midowga Europe ayaa iyagana ka qeyb qaatay gurmadka lagu soo badbaadinayey Tahriibayaal la socotay 14 dooni, kuwaasi oo ka soo shiraacday xeebaha dalka Libya.
© Warqabadka Dalsan Radio
