Dagaal u dhexeeyay laba Maleeshiyo beeleed ayaa gelinkii dambe ee shalay waxaa uu ka dhacay deegaanka Xananbuure ee Waqooyiga Gobolka Galgaduud, waxaana dhinacyada ay isku adeegsadeen hubka noocyadiisa kala duwan.
Ciidanka xoogga dalka qeybta 21-aad ayaa ku baxay dagaalkii ka dhacay Xananbuure, iyagoona ku guuleystay inay kala qaadan Maleeshiyaadkii ku dagaalamay deegaankaas, ayna weli ku sugan yihiin halkaas.
Saraakiil ka tirsan Ciidanka 21-aad ayaa sheegay in la kala qaaday Maleeshiyaadka, isla markaana ay wadaan dadaalo lagu soo afjaro Colaada soo cusboonaatay, waxaana amniga deegaanka lagu wareejiyay Ciidamo ka tirsan dowladda ilaa iyo xal la gaarayo.
Dagaalkii ka dhacay deegaanka Xananbuure ee Gobolka Galgaduud ayaa waxaa ay ka dhashay Khasaaro u badna dhaawacyo, waxaana dadka dhaawacmay loo qaaday dhinaca Magaalooyinka Cadaado iyo Dhuusamareeb.
Dagaalkaas ayaa la xiriira dad shacab ah oo laba habeen kahor weerar lagu qaaday xili ay ku sugnaayeen Goob maqaaxi ah oo ku taalla deegaanka Mareerguur, iyadoona halkaas ay ku dhinteen laba ruux, halka 6 qof kalena ay ku dhaawacmeen, Maamulka Galmudugna waxaa uu sheegay inay ku raad-joogaan raggii ka dambeeyay falkaas.
