Xiisad culus ayaa saaka laga dareemayaa Gobolka Awdal, kaddib xariggii xildhibaan Maxamed Abiib, taasoo abuurtay kacdoon iyo caro xooggan oo ka taagan magaalada Boorama iyo deegaannada ku dhow. Wararkii ugu dambeeyay ayaa sheegaya in jidka isku xira Boorama iyo Hargeysa, gaar ahaan meesha lagu magacaabo Gorayo-Cawl, ay gooyeen kooxo hubeysan, taasoo keentay in isu-socodkii gaadiidka uu istaago, iyadoo gaadiid badan ay halkaasi ku xaniban yihiin.
Dadweynaha magaalada Boorama ayaa si weyn uga falceliyay xarigga xildhibaanka, waxaana magaalada laga dareemayaa dhiilo iyo caro aad u xooggan oo ay ka dhalatay xariggaas. Xildhibaan Maxamed Abiib, oo ka tirsan baarlamaanka Somaliland, ayaa shalay lagu qabtay garoonka diyaaradaha ee Cigaal, iyadoo ay koox rag dharcad ah oo ka tirsan sirdoonka Somaliland ay ka dhex qabteen qeybta nasashada ee madaxda garoonka.
Xildhibaanka ayaa la sheegay in lagu qabtay isagoo aan wax war ah ka heynin qorshaha xariggiisa, wax yar kaddib markii uu soo galay garoonka. Kooxda sirdoonka ah ayaa si degdeg ah garbaha uga galay xildhibaanka, iyaga oo ku amray inuu raaco, inkastoo aan si rasmi ah loo faahfaahin sababta xarigga loo geystay.
Xariggan ayaa abuuray shaki iyo dareen aan wanaagsaneyn oo ka dhex dhashay bulshada iyo siyaasiyiinta, iyadoo su’aalo badan la iska weydiinayo sababta ka dambeysa xarigga xildhibaanka. Qaar ka mid ah siyaasiyiinta iyo shacabka Gobolka Awdal ayaa u arka xariggan mid si gaar ah loola beegsanayo xildhibaan Maxamed Abiib, taasoo laga yaabo inay saameyn ku yeelato xiriirka siyaasadeed ee ka dhex jira Somaliland iyo maamulka Gobolka Awdal.
Wararka qaar ayaa soo sheegaya in xarigga xildhibaanka uu salka ku hayo khilaaf siyaasadeed oo ka dhex oogan maamulka Somaliland, iyadoo qaar ka mid ah dadka u dhuun daloola arrimaha siyaasadda ay rumeysan yihiin in xariggu uu la xiriiri karo mowqifyada siyaasadeed ee uu xildhibaanku ku soo bandhigay baarlamaanka.
