Guddoomiyihii Barlamaanka dalka Lubnaan oo markii 6-aad loo doortay xilkaasi.

Barlamaanka cusub ee dalkaasi waxay maanta yeesheen Kulankoodii Koowaad,  iyagoo mar kale  Guddoomiye u doortay  Nabiih Berri oo 80-jir ah , kaasi oo xilkaasi hayey tan iyo sannadkii 1992-kii.

Nabiih Berri oo ah Siyaasi Shiico ah oo gacan-saar la leh Dowladda Iiraan iyo Ururka Xisbullaahi, waxaa xilkaasi u dooratay 98 ka mid ah 128 Xildhibaan ee ka tirsan Barlamaanka cusub ee Lubnaan.

Kuraasta Barlamaanka dalkaasi waxaa tiro isla eg u wadaaga Muslimiinta iyo Kirishtaanka ku wada nool dalkaasi.

Dhinaca kale, Madaxweynaha Lubnaan, Misheel Coon oo Kirishtaan ah ayaa la filayaa inuu xilka Ra’isul-wasaaraha u magacaabo Siyaasi ka soo jeeda Muslimiinta Suniyiinta ah.

Hoggaamiyaha Dhaqdhaqaaqa Mustaqal, ahna Sii-haya xilka Ra’isul-wasaaraha, Sacad Xariiri ayaa la filayaa in mar kale Xilkaasi loo dhiibo.