Booliiska Gaalkacyo oo qabtay Gaadiid siday dhuxul sharci darro ah

Ciidanka booliiska gobolka Mudug ayaa maanta qabtay 10 gaari oo siday dhuxul sharci darro ah oo horay ay u mamnuuceen mas’uuliyiinta Galmudug  ee gobolkaasi.

Taliyaha qeybta booliiska gobolka gaashaanle dhexe, Qaasim Shirdoon Cali, ayaa sheegay in sii wadayaan howlgalka lagu baacsanayo dadka sida sharci darada ah u jara dhirta si looga hor tago xaalufka ku imaan kara degaanka.

Sidoo kale, guddoomiyaha gobolka Mudug ee Galmudug, C/raxmaan Cali Diiriye, maanta warbaahinta qaranka la hadlay ayaa sheegay in uu bogaadinayo ciidankii ku guuleystay in ay soo qabtaan gaadiidkan siday dhuxusha, isagoo intaas ku daray in jarista dhirka lagu mamnuucey wareegto madaxweyne.

Qabashada dhuxushaasi ayaa timid xilli ay isku dayayeen wadayaashii Gaadiidkaasi in ay si dhuumaaleysi ah dhuxusha ku geliyaan suuqyada magaalada Gaalkacyo.

 

Comments
Loading...