Xildhibaanada Baarlamaanka dowlad Goboleedka Puntland ayaa ansixiyay wax-ka-beddel lagu sameeyey Dastuurka Puntland, kadib kulan ay ku yeesheen Xarunta ay ku shaqeeyaan ee magaalada Garoowe ee Xarunta Gobolka Nugaal.
Xildhibaanada Baarlamaanka Maamulka  ayaa dood kadib Cod gacan tag ah ku ansixiyay wax-ka-beddelka dhowr qodob oo kamid ah dastuurka, waxaana ogolaatay 54 Mudane,  6 Xildhibaan ayaana diiday, mana jirin cid ka aamustay.
Guddoomiyaha Golaha Wakiillada Puntland, Cabdirashid Yuusuf Jibriil Cawl oo fadhiga shir guddoominayay ayaa ku dhawaaqay natiijada codeynta, isagoona sheegay in la ansixiyay wax-ka-beddelka dastuurka Puntland.
Xildhibaanada Baarlamaanka Puntland ayaa tallaabadan qaaday, iyada oo aan weli laga heshiinin khilaafka ka taagan arrintaas ee u dhexeeya Xukuumadda Madaxweyne iyo mucaaradka.
Saacadihii lasoo dhaafay ayaa waxaa magaalada Garoowe ka socday waan-waanta ay wadeen Isimada dhaqanka oo doonayo in lagu xallinayo khilaafka Maamulka Madaxweyne Saciid Cabdullaahi Deni iyo siyaasiyiinta mucaaradka ah.
Dhinaca kale xaaladda Garoowe ayaa kala deggen, ka dib waan-waan ay tan iyo xalay wadeen isimmada dhaqanka, si ka duwan labaatankii bishii hore oo furista dastuurka dagaal ka dhashay.
