Madaxweyneyaasha dowlad Goboleedyada Puntland Saciid Cabdullaahi Deni iyo Jubbaland Axmed Maxamed Islaam Axmed Madoobe ayaa Caawa kulan gaar ah la qaatay Wakiilada Beesha Caalamka.
Kulanka u dhexeeyay dhinacyada ayaa waxaa looga hadlay Arrimaha doorashada dalka Soomaaliya ka dhacaya gaar ahaan khilaafka hareeyay qabsoomida doorashada oo aan weli laga heshiin.
Qoraal kasoo baxay Madaxtooyada Puntland ayaa waxaa lagu sheegay in dowlad Goboleedyada Puntland iyo Jubaland ay la wadaageen Beesha Caalamka aragtidooda ku aadan sida ugu wanaagsan ee uu qabsoomi karo Shirweynaha Doorashada.
Axmed Madoobe iyo Saciid Deni ayaa diiday ka qeyb galka Shirka Madaxda dowladda iyo kuwa maamulada ee la filayo inuu ka dhacdo Teendhada Afisyooni, iyagoona shuruudo ku xiray shirkaas, xili Madaxda maamul Goboleedyada ay is fahmi waayeen.
Beesha Caalamka ayaa Maanta kulan gaar ah la qaatay Ra’iisul Wasaaraha Xukuumadda xil-gaarsiinta Maxamed Xuseen Rooble, iyagoo kala hadlay dardar-gelinta dhameystirka heshiiskii 17-kii September 2020.
