Warar dheeraad ah ayaa kasoo baxaya dagaal sababay dhimasho iyo dhaawac oo shalay Ciidamo ka tirsan dowladda Soomaaliya iyo kuwa Jubbaland ku dhexmaray duleedka Balad-xaawo ee Gobolka Gedo gaar ahaan meel ku dhow Mandheera.
Dagaalkan ayaa waxaa uu yimid kadib markii Ciidanka dowladda Federaalka ay weerar xoogan ku qaadeen Saldhig Ciidanka Jubbaland ay ku leeyihiin duleedka Balad-xaawo, waxaana dagaalkaas la isku adeegsaday hubka noocyadiisa kala duwan.
Ugu yaraan 5 Askari oo ka kala tirsan Ciidanka dowladda iyo Jubbalad ayaa la sheegay inay ku dhinteen dagaalkii shalay, waxaana ku dhaawacmay 16 ruux oo labada dhinac iyo dad shacab ah, kuwaasi oo la geeyay Xarumo Caafimaad oo ku yaalla Balad-xaawo.
Dadka deegaanka Balad-xaawo oo la hadlay Idaacada Dalsan ee Magaalada Muqdisho ayaa waxaa ay u sheegeen in madaafiic kusoo dhacday Xaafado ka tirsan Balad-xaawo ay ka dhasheen Khasaaro, In kastoo aysan cadeyn karin inta uu la egyahay Khasaaraha.
Ciidanka dowladda iyo kuwa Jubbaland ayaa weli isku hor fadhiya goobihii shalay dagaalku ku dhexmaray, waxaana labada dhinac lasoo sheegayaa inay wadaan dhaq-dhaqaayo Ciidan.
Wararka ayaa intaas kusii daraya in dagaalkii ka dhacay duleedka Balad-xaawo uu sameeyn ku yeeshay Xuduudka Soomaaliya iyo Kenya gaar ahaan Magaalada Mandheera oo la sheegay inuu dagaalka kusii fiday.
