Faahfaahino dheeraad ah ayaa laga helayaa qarax ismiidaamin ah oo goordhoweyd ka dhacay agagaarka Iskool Boliisiya (Scuola Di Polizia) ee magaalada Muqdisho, kaasoo sababay khasaare naf iyo dhaawacba leh. Qaraxa ayaa ka dhacay xaafad isku raranta ah oo ku dhow barxadda Iskool Boliisiya, halkaas oo ay ku yaallaan geedo ay dadku harsadaan. Waxaa la xaqiijiyay in qaraxan uu si gaar ah u saameeyay shacabka iyo ciidamada amniga.
Waxaa si rasmi ah loo xaqiijiyay geerida Abwaan Sugaal Cabdulle, oo muddo ka badan 40 sano ka tirsanaa kooxda Heegan ee ciidanka Booliska Soomaaliyeed. Abwaanka oo ahaa gabyaa, mullaxan iyo heesaa caan ah, ayaa door weyn ku lahaa fanka ciidanka, wuxuuna bulshada Soomaaliyeed ku reebay raad muuqda. Geeridiisa ayaa naxdin ku abuurtay shacabka iyo fannaaniinta Soomaaliyeed oo uu muddo dheer la soo shaqeeyay.
Booliska ayaa sheegay in qaraxa uu sababay dhimashada 7 qof oo ay ku jiraan shacab iyo ciidamo boolis ah, halka 6 qof oo kale oo u badan dhaawacyo fudud loola cararay isbitaalada magaalada. Saraakiisha booliska ayaa xaqiijiyay in kooxaha gurmadka degdegga ah ay si dhaqso leh ugu howlgaleen goobta si ay u caawiyaan dadka ku waxyeelloobay qaraxa, iyadoo baaritaanno ay socdaan si loo ogaado ciddii ka dambeysay falkaasi argagixiso.
Qaraxyada ka dhaca Muqdisho ayaa wali caqabado amni ku ah caasimadda, iyadoo weeraradan ay saameyn ku yeesheen amniga shacabka iyo ciidamada oo isku dayaya inay ka hortagaan falalka amni darro.
