Wasaaradda Warfaafinta ee Xukuumadda Federaalka Soomaaliya ayaa shaaca ka qaaday in howlgal qorsheysan oo ay si wadajir ah u fuliyeen Ciidanka Qaranka Soomaaliyeed iyo Saaxiibada Caalamka lagu dilay 13 xubnood oo ka tirsan Al-Shabaab.
Howlgalka ayaa ka dhacay Buurta Cadayga ee degmada Ceelbaraf, gobolka Shabeellaha Dhexe, halkaas oo ay Alshabaab ku diyaarinayeen weerarro ka dhan ah shacabka deegaanka. Qoraalka ka soo baxay Wasaaradda Warfaafinta ayaa lagu sheegay in dadka la dilay ay isugu jireen horjoogayaal iyo maleeshiyaad, halka tiro kale oo ka tirsan kooxda la dhaawacay.
Sidoo kale, howlgalka waxaa lagu burburiyay saanad hub ah oo kooxdaasi ku kaydsanaysay goobta la beegsaday.
“Goobta la duqeeyay ayaa ahayd meel ay Alshabaab ku diyaarinayeen dhagaro ka dhan ah shacabka deegaanka,” ayaa lagu yiri war-saxaafadeedka.
